"Ek aur saaptahaant ..aur Vicharan ewam bhraman ki Yojana lagbhag taya thi.Lekin har baar ki tarah se iss baar ki bhraman yojana thodi Prathak thi..ek uddeshya liye hue thi.Mumbai XBHP ke abhinna angg rahe Bibek baabu sheegrha hi Mumbai XBHP ko tyaag kar Kolkata visthaapit ho rahe he.
Pratah 6:30 baje sabhi Kalamboli McD par ekatrit hue aur chand khsaano ke liye vartaalap karne ke paschaat,apni manzil ROHA ki ore prashthaan aarambh kia.Is Safar me kewal mien,Bibek,DK bhau aur Ketan hi sammilit ho paye the.Motorbhabhi ke aane kaa andesha tha,parantu woh shayad kinhi karano se upastithi nahi de payii.
Yakeen maniye subah subah kaa samay NH17 maarg kaa vistaar..100 ki ausat raftar se bhagti hui teen R15 aur ek kaala saand (P200) ..woh wadhkhal ke pehle kohre se dhaka hua ilaka..woh marg me rukkar surya ki roshni ewam makadi kaa chaya chitran...sabhi gatividhiya apne aap me adbhut anand dene waali aur rochak thi.Ek sushmaa antaral tak bina ruke chalne ke baad hum ek aniyamit aur anaayojit sthal pe ruke.Jahan pe humne dher saare chaaychitra kheeche.
Yaha par takreeban aadhe ghante vyatit karne ke baad hum log punah apne gantavya ki ore sawar ho gaye.Hamara agala padav tha Wadkhal jaha pe humne ji bhar ke jalpaan kia..Swadisht Misal paav ewam wada Usal.
Koi atirikta samay vyarth kiye bina hum log Roha ke liye nikal pade.NH17 pe jab DK bhau aur Bibek aage nikal gaye..toh me aur Ketan ek choti si Jhadap me sanlagna ho gaye the.Darasal ek Maharathi galat disha se hamari gali me pravesh kar rahe the woh bhi bina hamari taraf dekhte hue aur hum log takreeban 80-90 ki raftar me the.Baat toh dhakke mukke tak aa gai thi,but hum logon ne socha gawaron ke muh lagne se koi faayda nai he.Toh hum log fata-fat apni dhanno ko utha ke nikal liye.Wadkhal se thoda hi aage ek Setu se humne daaya mode liya Roha ki taraf.Joh rasta humne ikhtiyaar kia woh dher saare gaddhon se parioorna tha.
Thodi der chalte rehne ke baad hum logon ko yeh ehsaas hua ki hum galat disha me aa gaye he..vishesh dhanyawaad hamare sthaniya soochak ko
Jaha hame is baat kaa ehsaas hua..waha hamne chand kshano ke liye aaram pharmaane kaa nirnaya liya aur kuch tasveeren kheechi.
Waha se nikalne ke baad hamara agala padav tha Salav Ganesh Temple.Waha sabse dukhad baat ye hui ki itne khubsurat mandir parisar me kisi bhi prakar ki pratibimb lene ki peti le jaane ki sakht manahi thi.Ganesh ji ke darshan kiye aur Hamare priya mitra SB ke liye sundar,susheel,gharelu aur khandaani vadhu ki kaamna ki
Uske paschaat hum log takreeban 15-20 minton tak upwan me vicharan karte rahe joki mandir parisar me hi tha.
Agala thikana tha Roha beach jaha pe hum kaafi sangharsh karke apni dhanno's ko leke gaye.Waha bhi hamne dher saari tasveeren uthayi.
Uske pashchat waha se nikalke Surbhi hotel me Swadisht Konkani bhojan kaa anand uthaya.
Apne udarr ki pipasa shaant karne ke paschaat hum log seedhe ghar ki ore nikal padae.
Ek aur atyant ki manoram aur suhaane safar kaa anntt...naye safar ki raah me nikalenge hum phir se...lekin tab tak ke liye..JAI RAAM JI KI
Lijiye pesh he is safar ki kuch tasveeren "
Hope you enjoyed reading the LOG :D...
Cheers
Biru
No comments:
Post a Comment